ວັງວຽງແດນມິ່ງເມືອງຊອງ

ມາວັງວຽງ ນັບຄັ້ງຈົນບໍ່ຈື່ ຄິດຢາກເວົ້າກ່ຽວກັບວັງວັງ ແຕ່ບໍ່ມີໂອກາດ ຈຶ່ງຍາດເວລາທີ່ມາມາເຝິກອົບຮົມຄັ້ງວັນທີ 6-10 ກໍລະກົດ 2015 ນີ້ລະ ພໍໄດ້ມີເວລາເປັນຂອງຕົນເອງແດ່ເລັກນ້ອຍ ກໍເລີຍຂຽນໄປຕາມອາລົມ...

ກ່ອນນີ້ຫລາຍປີ ໄດ້ມີໂອກາດໜ້ອຍໜຶງ ພາຄອບຄົວມາທ່ຽວວັງວຽງ ແຕ່ມາຍາມທີ່ຝົນຕົກ ເລີຍທ່ຽວບໍ່ມ່ວນປານໃດ ແຕ່

ດ້ວຍ​ພູມສັນຖານ ​ແລະ ​ບັນຍາກາດ​ຂອງ​ເມືອງ​ວັງ​ວຽງ ​ທີ່​ໂອ​ບອ້ອມ​ໄປ​ດ້ວຍ​ພູ​ຜາ​​ ແລະ​ ສາຍ​ນ້ຳ ​ເຮັດ​ໃຫ້​ວັງ​ວຽງ​ຖືກຍົກ​ຍ້ອງ​ໃຫ້​​ຄື​ ກຸ້ຍ​ຫຼິນ ຂອງ​ປະ​ເທດ​ຈີນ ​ໂດຍ​ສະ​ເພາະ​ໃນ​ຕອນ​ເຊົ້າທີ່​ມີສາຍ​ໝອກລອຍ​ພາດ​ຜ່ານຂຸນ​ເຂົາ​ ແລະ ​​ແມ່ນໍ້າຊອງ ຈຶ່ງຢາກໃຫ້ຫລາຍຄົນໃຫ້ໂອກາດຕົນເອງໄດ້ມາພັກຜ່ອນຢ່ອນອາລົມ ພໍໄດ້ສະບາຍໃຈ....

ປັດຈຸບັນ​ເມືອງ​ວັງ​ວຽງ​ ເປັນ​ສະຖານ​ທີ່​ຍອດ​ນິຍົມ ​ຂອງ​ບັນດາ​ນັກ​ທ່ອງທ່ຽວມີທັງມາແບບເປັນໝູ່ຄະນະ ຫລື ມາແບບແບັກ​ແພັກ​ເກີ້ຢ່າງ​ເຕັມ​ໂຕ ເພາະມີກິດຈະ​ກຳ​ອັນ​ຫຼາກຫຼາຍ ເຊິ່ງສ່ວນ​ໜຶ່ງ​ແມ່ນ​ຮອງ​ຮັບ​ນັກ​ທ່ອງ​ທ່ຽວ​ທີ່ມັກ ການປະຈົນ​ໄພ ບໍ່​ວ່າ​ຈະ​ເປັນ​ການພາຍ​ຄາ​ຍັກ, ຂີ່​ກົງ​ເບັງ, ທ່ຽວຊົມ​ຖ້ຳງາມ ​ເປັນຕົ້ນ.

ເມືອງ​ວັງ​ວຽງ​ນອກ​ຈາກ​ຈະ​ເປັນ​ເມືອງ​ທີ່​ສວຍ​ງາ​ມທີ່​ຖືກ​ໂອບອ້ອມ​ດ້ວຍ​ໜ່ວຍພູ​ແລະ​ຜາ​ຫິນ​ອັນ​ສະຫຼັບຊ້ອນ​ ພ້ອມ​ທັງ​ສາຍ​ນ້ຳຊອງ​ທີ່​ແສນ​ງາມ​ແລ້ວ ຍັງ​ມີ​ຖ້ຳທີ່ໜ້າທ່ອງ​ທ່ຽວ​ຈຳນວນ​ຫຼວງຫຼາຍ ​ເຊັ່ນ ຖ້ຳຈັງ, ຖ້ຳຊ້າງ, ຖ້ຳຫອຍ, ຖ້ຳພູ​ຄຳ, ຖ້ຳນ້ຳ, ​ຖ້ຳນອນ ​ແລະ​ ຜາຕັ້ງ. 

ຖ້ຳຈັງ​ຕັ້ງຢູ່ ​ໄກ​ຈາກ​ສະໜາມບິນ​ເກົ່າ​ປະມານ 500 ​ແມັດ ​ເພິ່ນ​ຈະ​ເປີດ​ໃຫ້​ເຂົ້າທ່ຽວ​ຊົມ ​ແຕ່​ເວລາ 8:00 ​ 17:00 ​ໂມງ ​ເປັນ​ຖ້ຳ​ແຫ່ງ​ດຽວ​ທີ່​ມີ​ໄຟຟ້າ​ຕິດ​ຕັ້ງຢູ່​ພາຍ​ໃນ​ຖ້ຳກ່ອນໝູ່, ​ໃນ​ອະດີດ​ປະ​ຊະ​ຊາ​ຊົນ​ເຊື່ອ​ວ່າ​ຖ້ຳ​ແຫ່ງ​ນີ້​ເປັນ​ຖໍ້າສັກສິດ ຖ້າ​ໃຜ​ເຮັດ​ສິ່ງ​ທີ່​ບໍ່​ດີ​ບໍ່ງາມ​ໃນ​ຖ້ຳຈະ​ເກີດ​ອາການ​ຈັງ ​ເຊິ່ງອາການ​ຈັງ​ໄດ້​ກາຍ​ມາ​ເປັນ​ຊື່ຂອງຖໍ້າ ທີ່ເອີ້ນກັນສືບມາວ່າ “ຖ້ຳຈັງ”. ຫາກຕ້ອງການທ່ຽວຊົມຖໍ້າຈັງ ທ່ານຕ້ອງອອກ​ແຮງ​ຂຶ້ນຂັ້ນ​ໄດ 147 ຂັ້ນ ທີ່ມີລັກສະນະຊັນ ​ເຊິ່ງທາງ​ຂ້າງ​ເທິງ​ນັ້ນ ເຮົາຈະ ມອງເຫັນວິວທີ່​ງາມໆ​ຂອງ​ຂົວ​ສີແສດຂ້າມນ້ຳຊອງ ແລະ​ ເມືອງ​ວັງ​ວຽງ​ ໃຫ້​ເບິ່ງ​ເຊິ່ງຖືວ່າເປັນ​ລາງ​ວັນ​ສຳລັບ​ຄົນ​ອົດ​ທົນ​ຂຶ້ນຂັ້ນ​ໄດ ນັບ​ວ່າ​ເປັນ​ຈຸດ​ຊົມ​ວິວທິວ​ທັດ​ທີ່​ສວຍ​ງາມ​ທີ່​ສຸດ​ຂອງ​ເມືອງ​ວັງ​ວຽງ​ອີກ​ດ້ວຍ.

​ເມື່ອ​ເຂົ້າ​ໄປ​ພາຍ​ໃນ​ຖ້ຳຈັງ​ທ່ານ​ຈະ​ໄດ້​ສຳ​ຜັດ​ກັບ​ອາກາດ​ເຢັນ​ສະບາຍທ່າມກາງ​ຫີນ​ຍ້ອຍ​ຫີນ​ງອກອັນ​ງົດ​ງາມ​ທີ່​ສຸດ ​ເມື່ອ​ມີ​ແສງ​ໄຟຟ້າ​ສາດ​ສ່ອງ​​ເກີດມີ​ສີ​ສັນ​ເປັ່ງປະກາຍ ​ເຮັດ​ໃຫ້​ພາຍ​ໃນ​ເບິ່ງ​ລຶກລັບ​ຄື​ດັ່ງ​ເມືອງ​ໃນ​ເທບ​ນິຍາຍ​ທີ່​ມີ​ສະ​ເໜ່ຊວນຫຼົງ​​ໄຫຼ ​ໂດຍ​ທ່ານ​ສາມາດຍ່າງ​​ເລາະ​ຊົມ​ໄດ້​ຕາ​ມທາງ​ຊີ​ມັງ​ທີ່​ເຮັດ​ໄວ້​ຢ່າງ​ດີ ​ແລະ ​ຖ້າ​ຍ່າງ​​ໄປ​ທາງ​ຊ້າຍ​ສຸດ​​ເສັ້ນທາງ​ຈະ​ພົບ​ກັບ​ຈຸດ​ຊົມ​ວິວທີ່ສວຍ​ງາມ​ບໍ່​ນ້ອຍໜ້າບໍລິ​ເວນ​ປາກ​ທາງ​ເຂົ້າຖ້ຳ.

ເວລາຊ່າງສັ້ນ ບໍ່ມີເວລາພໍທີ່ຈະບັນຍາຍສູ່ຟັງ ຫວ່າງໆຍາມໃດຈະກັບມາເວົ້າສູ່ຟັງໃໝ່ ມື້ນີ້ທ້ອງຟ້າບໍ່ສົດໃສ ເພາະມີຝົນຕົກມາແຕ່ວານນີ້ ແຕ່ກໍມີນັກທ່ອງທ່ຽວ ຢ່າງຫລວງຫລາຍ ຍ່າງໄປມາ....ຈົນຫູໜວກ ແລະ ລາຍຕາ...

ຫາກມື້ໃດມີເວລາ, ມື້ໃດທີ່ຍັງມີໂອກາດມາວັງວຽງອີກ....ເລື່ອງເລົ່າຈະມີໃໝ່...

ສະບາຍດີ

ບ້ານນອກບ້ານອກໆໆໆ

....ບ້ານນອກໆ...ຂໍເລົ່າສູ່ຟັງ...

ພື້ນຖານຂອງຂ້ອຍຄືຄົນບ້ານນອກໆ....ອີ່ຫລີ....ອາຍຸໄດ້13-14 ປີກໍຈາກບ້ານມາ ເພື່ອການສຶກສາ ແລະ ການງານ....ມາຮອດດຽວນີ້(ດົນເຕີບແລ້ວ) ຈຶ່ງຄິດໄດ້ວ່າ ຄວາມສຸກມັນບໍ່ໄດ້ຢູ່ທີ່ເງິນ, ຖານະຕຳແນ່ງ....ເທົ່ານັ້ນ ແຕ່ຄວາມສຸກມັນເກີດ ໄດ້ແມ່ນແຕ່ເວລາທີ່ເຮັດວຽກທີ່ໜັກໜ່ວງໃນທົ່ງໄຮ່ທົ່ງນາ....

ກ່ອນນີ້ຂ້ອຍຄິດວ່າ່ ການເປັນຊາວໄຮ່-ນາ ແມ່ນຄົນທຸກຍາກລຳບາກ ແຕ່ຄວາມ ຈິງແລ້ວມັນບໍ່ແມ່ນທັງໝົດ....ຫາກເຮົາພ້ອມກັບການຍອມຮັບຄວາມຈິງ....

ຂ້ອຍຈຳໄດ້ວ່າ ແຕ່ລະມື້ຫລັງຈາກກັບຈາກວຽກໄຮ່ການນາມາ ພໍ່-ແມ່-ລູກ ຊ່ວຍ ກັນແຕ່ງຢູ່ຄົວກິນຕາມອັດຕະພາບ ບາງມື້ກໍມີລວກຜັກທີ່ເກັບໄດ້ຈາກ ຫົວໄຮ່ ປາຍນາ, ມີປູປາໂຕນ້ອຍໆ ທີ່ໄດ້ຈາກລຳຫ້ວຍ ຫລື ກົບຂຽດທີ່ໄປໄຕ້(ໄປກ້ານ)ມາໄດ້ແຕ່ ມື້ຄືນນີ້....ໄດ້ພໍເຮັດປົ່ນເຮັດແຈ່ວ....ແລ້ວກໍພາກັນກິນ ຄອບຄົວໃດ ມີຫ້າຄົນ, ສິບຄົນ ກໍນັ່ງອ້ອມພາເຂົ້າກິນພ້ອມກັນ ລົມກັນວ່າມື້ອື່ນຈະເຮັດຫັຍງດີ ກ່ອນຈະພັກຜ່ອນຫລັບນອນເອົາແຮງໄວ້ເຮັດວຽກໃນມື້ໃໝ່....

ຄົນບ້ານຂ້ອຍ ເມື່ອເຖິງຍາມແລງຍາມງາຍ ຍ່າງກາຍກັນກໍຈະຖາມວ່າ ກິນເຂົ້າ ແລ້ວເບາະ ?....ໄປກິນເຂົ້ານຳກັນເດີ້ ມື້ນີ້ມີແນວແຊບ....ຫລື ບໍ່ກໍຖາມກັນວ່າ ມື້ນີ້ເຮັດຫຍັງກິນ, ກິນເຂົ້າກັບຫຍັງ ?...ຄຳເວົ້າເລົ່ານີ້ ຂ້ອຍຍັງຈົດຈຳມາຕລອດ ແລະ ຫາກມີອາຫານແຊບ ຫລື ມືການມີງານ ກໍຈະວານກັນມາຊ່ວຍເຮັດຊ່ວຍກິນ ໂດຍບໍ່ມີການຮຽກຮ້ອງຄ່າຕອບແທນ.... 

ຕອນເຊົ້າໆ ເອົາງົວ-ຄວາຍໄປລ້ຽງ ຕອນແລງໆເອົາງົວຄວາຍເຂົ້າແລ່ງ...ເວລາທີ່ ຊາວບ້ານມາພົບກັນມັກຈະຖາມກັນວ່າ ນາເຈົ້າເປັນແນວໃດ ເຂົ້າງາມບໍ່ ? ມີເພ້ຍ ມີແມງລົງບໍ່ ? ແລ້ວນາແລ້ວຈະໄປເຮັດຫຍັງດີ...ມື້ອື່ນຊິໄປລ້ຽງຄວາຍຢູ່ໂຄກນັ້ນ ໂຄກນີ້ນຳຂ້ອຍບໍ່ ຫຍ້າຫລາຍ...ໄປຊອກເກັບເຫັດ-ຫາປານຳກັນເບາະ....ຈີ່ນາຍຢູ່ ເລົ່ານັ້ນ ຜັກຫວານຢູ່ໂຄກນີ້ມີຫລາຍໄປຊອກຫານຳກັນບໍ່ ຂ້ອຍຊິໄປເອີ້ນເດີ້...

ເຖິງຍາມນາ ຫລາຍຄົນບໍ່ກັບບ້ານ ເອົາຖຽງນາເປັນເຮືອນ ເພາະບໍ່ຢາກເສຍເວລາ ຍ່າງໄປ-ກັບ ເວລາຄຸມວຽກໄຮ່ການນາ, ຍາມນີ້ອາຫານການກິນບໍ່ອຶດ ມີຫອຍ ປູປາຂີ້ຄາດ, ມີໜໍ່ໄມ້ທີ່ເກີດໃນກໍແຄມຮົ້ວ, ມີເຫັດໄລ່ເຫັດຮວກ, ມີເຫັດປວກ ເຫັດດົງ...ໂອ້ຍ...ພຽງຄິດກໍສຸກໃຈແລ້ວ...ມີໃຜຢາກໄປຢາມບ້ານເກີດຄືຂ້ອຍບໍ່...

 ກິນເຂົ້າແລ້ວ ກໍພານ້ອງໄປຫລິ້ນວັດ ໄປກໍ່ກອງດິນຊາຍ, ໄປຫລິ້ນໝາກຕີ່, ໄປຫລິ້ນໝາກລີ້ ແລະ ຂໍເຂົ້າຕົ້ມຄູບາ.....

ຄິດໄປຄິດມາລະບໍ່ຢາກບັນຍາຍ....ຄິດຮອດບ້ານ....

.....ທຸກຢ່າງມັນເປັນອະດີດໄປແລ້ວ......

ອະດີດນັ້ນເຖິງຈະລົບໄດ້ດ້ວຍຄວາມຕາຍກໍຕາມ ຍາມມີລົມຫາຍໃຈຢູ່ນີ້

ຂໍຄິດຄວບຄູ່ກັບການປະຕິບັດໜ້າທີ່ຂອງຕົນເອງໃຫ້ສຳເລັດຜົນ ເພື່ອຄົນຜູ້ທີ່ ຈະສືບທອດເຊື້ອສາຍລາຍລ່ອງ....ໃຜມີເລື່ອງດີໆກໍຢ່າລືມແບ່ງປັນ ຜ່ານການ Comment ຂ້າງລຸ່ມນີ້ແດ່ເດີ້....ຮັກແພງທຸກຄົນ

(ຂອບໃຈທີ່ຕິດຕາມ)

ອາຍຸ ວັນໂນ ສຸຂັງ ພະລັງ ຕລອດປີໃໝ່ ຈ.ສ 1377

ພອນປີໃໝ່ລາວ

ໂດຍ: ສະດຸດຕາ ສາຍຮຸ່ງ

ດວງນີ້ ຊື່ວ່າດວງດອກຊ້ອນ     ຂໍຊອນສົ່ງພອນໄຊ

ໃຫ້ແດ່ ພົງພັນລາວ    ເພື່ອນສະຫາຍຫລາຍໜ້າ

ຂວບເມື່ອເມສາເຂົ້າ   ສັງຂານເນົາປີໃໝ່

ປະເພນີວ່າໄວ້  ບູຮານກີ້ເກົ່າປະຖົມ ……

ຮຽມຂໍກົ້ມກາບໄຫວ້    ພຣະໄຕຣສິ່ງສັກສິດ

ທີ່ສະຖິດໃນພູມຖານ  ຍ່ານໂລກາກວ້າງ

ຂໍຈົ່ງ ຄອຍຊູຊ້ວນ ຊວນກະທຳໃນສິ່ງຊອບ

ປະກອບການ…ໃຫ້ກ້າວໜ້າ ຜະລະໄດ້ດັ່ງໃຈ…

ປີໃໝ່ນີ້ ໃຫ້ມີໂຊກໄຊຊະນະ ທຸກຄົນເນີ

ຖາຖະໜາແນວໃດ ທີ່ຊອບທຳທາງກ້າວ

ຂໍໃຫ້ແວວວາວເຫລື້ອມ ເໝືອນຈັນເພັງພົ້ນພຸ່ງ

ຊື່ວ່າ ຄວາມຍາກຫຍຸ້ງ ຢ່າມາໃກ້ກ່ຽວກາຍ ນັ້ນເນີ

ປີໃໝ່ນີ້   ໃຫ້ທຸກທ່ານພົງພັນລາວ

ສຸກທັງກາຍ ສຸກທັງໃຈ ໂລກໄພຢ່າພານພໍ້

ຂໍໃຫ້ສຸກຂີສ້າງ ສາມັກຄີທຸກເພດເຜົ່າ

ເຈົ້າຊ່ວຍຂ້ອຍ ຂ້ອຍຊ່ວຍເຈົ້າ ປີມະແມຍ່າງເຂົ້າ ຊຸມເຈົ້າຢ່າເກົ່າສີ ນັ້ນເນີ.

(ຈົບ)

ຫາກມີໂອກາດ ທ່ານຈະໄປທ່ຽວຫລວງພະບາງບໍ່ ?

ຫລວງພະບາງເມືອງງາມອາຣາມຮຸ່ງ, ເມືອງນຸ່ງສິ້ນໄໝ, ຂັວນໃຈນັກທ່ອງທ່ຽວ, ເມືອງກ້ຽວຄຳຫວານ, ຕຳນານຂັບທຸ້ມ, ງາມພູຕັ້ງກາງເມືອງ ເລື່ອງລືວັດທະນະທໍາ, ເອາະຫລາມໃສ່ສະຄານ, ງານຊ່ວງ ເຮືອເດືອນເກົ້າ, ວັດເກົ່າແກ່ມາກມີ, ຕາດກວາງຊີ ລະ ຖ້ຳຕິ່ງ ເປັນມິ່ງເມືອງມໍລະດົກໂລກ

ແຂວງຫຼວງພະບາງ Luangprabang Province ເປັນແຂວງໜຶ່ງທີ່ນອນໃນພາກເໜືອຂອງ ສາທາລະນະລັດ ປະຊາທິປະໄຕ ປະຊາຊົນລາວ ມີເນື້ອທີ່ປະມານ 18,000 ກິໂລແມັດມົນທົນ. ເມືອງຫລວງພະບາງ ເປັນເມືອງເອກຂອງແຂວງນີ້ ເຊິ່ງຕັ້ງຢູ່ບໍລິເວນແຄມຝັ່ງແມ່ນ້ຳຂອງ ແລະ ແມ່ນໍ້າຄານ ຊຶ່ງໄຫຼມາປ່ອງໃສ່ກັນ ເມືອງຫຼວງພະບາງໃນອະດີດແມ່ນ ລາຊະທານີ ທີ່ຮຸ່ງເຮືອງແລະເຟື່ອງຟູທີ່ສຸດຂອງອານາຈັກລ້ານຊ້າງ.  ນັບໄດ້ວ່າ ເມືອງຫຼວງພະບາງ ແມ່ນເມືອງງົດງາມ ທີ່ເຕັມໄປດ້ວຍສິນລະປະຂອງສະຖາປັດຕະຍະກຳ ວັດທະນະທຳ ປະເພນີ ລະ ຂະຫນົບທຳນຽມ ໃນການດຳລົງຊີວິດຂອງປະຊາຊົນ...ຈຶ່ງເຮັດໃຫ້ອົງການ ຢູເນສໂກ ໄດ້ຂຶ້ນທະບຽນໃຫ້ັເປັນ ເມືອງມໍລະດົກໂລກທາງວັດທະນະທຳຂອງມວນມະນຸດຊາດ ຕັ້ງແຕ່ ປີ ຄ.ສ 1995 ເປັນຕົ້ນມາ.

ຫໍພິພິທະພັນແຫ່ງຊາດ(ພະລາຊະວັງເກົ່າ) ຕັ້ງຢູ່ໃຈກາງເມືອງຫລວງພະບາງ(ບ້ານຈູມຄ້ອງ) ເຊິ່ງກ່ອນນີ້ເປັນພະລາຊະວັງຂອງເຈົ້າຊີວິດ ເຊິ່ງສ້າງຂຶ້ນໃນປີ ຄ.ສ 1904. ປັດຈຸບັນພິພິທະພັນແຫ່ງນີ້ ໄດ້ກາຍເປັນບ່ອນວາງສະແດງວັດຖຸພັນທີ່ມີຄ່າ ໃນລາຊະການຕ່າງໆ ແລະ ໄດ້ເປີດໃຫ້ນັກທ່ອງທ່ຽວໄດ້ເຂົ້າຊົມທຸກມື້ ໃນເວລາ 8:30-11:30 AM ແລະ 1:30-3:30 PM ແລະ ມາຮອດກາງຄືນ ບໍລິເວນນີ້ກໍຈະຈັດເປັນຕະຫລາດນັດ ຂາຍຜະລິດຕະພັນປະເພດເຄື່ອງຫັດຖະກຳ ແລະ ຂອງທີ່ລະລຶກ ເຊິ່ງຫລາຍຄົນທີ່ໄປຫລວງພະບາງຍາກທີ່ຈະພາດ...

ວັດຊຽງທອງ ເປັນວັດເກົ່າແກ່ ສ້າງຂຶ້ນສະໄໝເຈົ້າໄຊຍະເສດຖາທິລາດເປັນເຈົ້າຊີວິດ(ຄ.ສ 1559-1560) ວັດນີ້ກໍຕັ້ງຢູ່ແຄມຂອງ ບ້ານຊຽງທອງ ໃຈກາງເມືອງຫລວງພະບາງ ເປັນວັດທີ່ສະແດງອອກເຖິງສີລະປະ ຂອງຄວາມເປັນຊາດລາວແທ້ໆ ນັກທ່ອງທ່ຽວສາມາດເຂົ້າຊົມໄດ້ແຕ່ເວລາ 8:00 AM-5:00 PM

ນອກນີ້ ທີ່ເມືອງຫລວງພະບາງຍັງມີພະທາດພູສີ, ວັດວາອາຮາມ ທີ່ເກົ່າແກ່ ແລະ ມີສະຖານທີ່ທ່ອງທ່ຽວດ້ານ ວັດທະນະທຳ ອີກຢ່າງຫລວງຫລາຍ ເຊິ່ງເໝາະແກ່ການທ່ຽວຊົມ

ປາກນ້ຳຄານ ປ່ອງໃສ່ນ້ຳຂອງ

ນ້ຳຕົກຕາດກວາງຊີ ທີ່ຫລວງພະບາງ ກ່ອນທີ່ຕາດແຫ່ງນີ້ຈະເຈື່ອນ(ພາບປີ 1997)

ຕາດກວາງຊີ ເປັນຕາດທີ່ມີນ້ຳຕົກສວຍງາມຕະລອດປີ ຕັ້ງຢູ່ບ້ານທ່າແປ້ນ ຫ່າງຈາກຕົວເມືອງຫລວງພະບາງ ປະມານ 25 ກິໂລແມັດ, ນ້ຳຕົກແຫ່ງນີ້ເປັນນ້ຳຕົກທີ່ສວຍງາມເປັນພິເສດ ເພາະມີສີມໍລະກົດ(ຂຽວສົດໃສ), ມີບ່ອນເປັນວັງ, ເປັນພັກ ທີ່ຮົາສາມາດລົງຫລິ້ນໄດ້ ເຊິ່ງມັນຢູ່ທ່າມກາງປ່າໄມ້ໃຫຍ່ທີ່ມີຄວາມອຸດົມດ້ວຍຕົ້ນໄມ້ໃຫຍ່ ແລະ ພືດຫລາຍຊະນິດ

ໃນບໍລິເວນນ້ຳຕົກຕາດກວາງຊີ ຍັງມີການບໍລິການທ່ຽວປ່າ ໂດຍທ່ານສາມາດຍ່າງເລາະຊົມປ່າທຳມະຊາດໄດ້ ໂດຍໃຊ້ເວລາຍ່າງປະມານ 3-4 ຊົ່ວໂມງ ເຊິ່ງນີ້ແມ່ນການທ່ອງທ່ຽວແບບອະນຸລັກ ເຊິ່ງປະຊາຊົນມີສ່ວນຮ່ວມ. ໃນການທ່ອງທ່ຽວແບບໜທ່ານຈະໄດ້ສຳຜັດກັບວິຖີຊີວິດຂອງຊົນເຜົ່າມົ້ງ ພ້ອມຄວາມງົດງາມຂອງທຳມະຊາດ

ທ່ານສາມາດໄປທ່ຽວຕາດກວາງຊີໄດ້ທຸກມື້  ເປີດບໍລິການແຕ່ 8:00 AM - 5:00 PM

(ຕາດແສ້ ທີ່ຫລວງພະບາງ 1997)

ຕາດແສ້ ເປັນຕາດຫີນປູນ ມີສາມຖ້ານ ເຊິ່ງມີຄວາມສວຍງາມຫລາຍ ຕາດແຫ່ງນີ້ຫ່າງຈາກເມືອງຫລວງພະບາງປະມານ 16 ກິໂລເມັດ, ມັນຕັ້ງຢູ່ເຂດບ້ານແອນ ເມືອງຊຽງເງິນ, ຕາດແສ້ຈະມີນ້ຳຫລາຍໃນຍາມຝົນ ແຕ່ຄົນທີ່ຈະໄປທ່ຽວຕາດແສ້ ຕ້ອງບໍ່ຢ້ານນ້ຳ ເພາະຫລັງຈາກຂີ່ລົດໄປແລ້ວ ຕ້ອງໄດ້ຂີ່ເຮືອໄປຕາມແມ່ນ້ຳຄານປະມານ 10 ນາທີ. ໃນບໍລິເວນຕາດແຫ່ງນີ້ຍັງມີບໍລິການຂີ່ຊ້າງນຳທ່ຽວທຳມະຊາດນຳອີກ....ເປີດບໍລິການແຕ່ 8:00 AM - 5:00 PM

ຫາກທ່ານຕັ້ງໃຈວ່າຈະໄປທ່ຽວຫລວງພະບາງ ທ່ານຈະບໍ່ຜິດຫວັງ ເພາະສະຖານທີ່ທ່ອງທ່ຽວມີຢ່າງຫລວງຫລາຍ ໂດຍສະເພາະໃນເມືອງຫລວງພະແບາງ ແລະ ເມືອງທີ່ໃກ້ຄຽງ ດັ່ງນັ້ນ ຈຶ່ງເຮັດໃຫ້ຜູ້ຄົນທັງພາຍໃນ ແລະ ຕ່າງປະເທດ ຢ່າງຫລວງຫລາຍພາກັນໄປທ່ຽວຫລວງພະບາງ....

ປີນີ້ ເປັນປີທີ 20 ທີ່ຫລວງພະບາງໄດ້ກາຍເປັນເມືອງມໍລະດົກໂລກ ແລະ ເປັນປີທີ່ເມືອງຫລວງພະບາງ ໄດ້ຍົກຍ້ອງໃຫ້ເປັນເມືອງຍອດນິຍົມອັນດັບໜຶ່ງຂອງໂລກ ດ້ວຍຄະແນນ 97,14% ຈາກການໃຫ້ຄະແນນຂອງນັກ ທ່ອງທ່ຽວທົ່ວໂລກ ໂດຍຜ່ານວາລະສານ ວັນເດີລາສ ປະຈຳປີ 2015 ແລະ ໃນນີ້ປະເທດ ສປປລາວ ຍັງຕິດອັນດັບ 8 ໃນ 10 ປະເທດຍອດນິຍົມຕື່ມອີກ ດ້ວຍຄະແນນ 95,25%....ລາຍລະອຽດເຂົ້າອ່ານໄດ້ຕາມລິ້ງລຸ່ມນີ້:

ກົດອ່ານບ່ອນນີ້ເດີ້

ສະຖານທີ່ພັກຊົມທິວທັດ ທີ່ພູຄູນພຽງຟ້າ ເມືອງພູຄູນ ຂ.ຫລວງພະບາງ

ສະຖານທີ່ພັກຊົມທິວທັດ ທີ່ພູຄູນພຽງຟ້າ ເມືອງພູຄູນ ຂ.ຫລວງພະບາງ(ດ້ານຫລັງ)

(ສະຖານທີ່ ທີ່ຄວນຈະໄປ ຫາກໄດ້ໄປຫລວງພະບາງ)
ຂອບໃຈທີ່ອ່ານ....ມື້ໜ້າຈະມາເວົ້າສູ່ຟັງໃໝ່

ສະບາຍດີ